Originally posted at gigaquitonline.com around November 2007
By: Mar Recentes
Marajaw Karajaw na adlaw sa ijo hurot! Bata pa ako di ko kalimtan an Higakit. Presko an lugar, limpyo an hangin sanan simple ra an kinabuhi. Sa pagmata sa buntag sa tuktugaok sa manok, sige dajon magpreparar nan kape para madangkahan an tijan. Dyagan dajon sa duot kay ulian man nan mga baroto gikan sa tibuok duyom na pamingwit, palangre sanan panuyo. Hamok sab mamukotay na aja ra sab manuba an imo masugatan, na aja rakan sab sinkasikja nan kaibanan kay tiwas man an kuha sa kinilaway! Hik!
Sa mga lugar sa Parang, Mahanub o Ilaja, sajo ra an pagmata kay eskuyla man nan mga bata, sanan itugway man an mga karabaw lagi. Nganga an lami na pang-usun para sab mamuya an talinga. Pag abot nan alas otso, halos tanan jadto na sa isig ka empleyo o aktibidades. Pero jaoy sab hamok na ajara sab gihapon sinka tagkdug
sa ingkoranan kay waya may lagi maisip na trabaho -- in short -- puluho. Sa ako naagian na kinabuhi, gana an kinabuhi nan isa ka batan- on na ajara sin eskuyla -- bisan an bayon linupak ra, sahay matagaan nan baynte sinko para ays kinde. Sa tinuod, nadaya na ako sa binignit ni Mana Mina Azumen, bisan lami gajod pero pirme ba jaon na kinaon mo kada adlaw mga tuyo o upat na ka buyan (kay Good For man ni Nanay...). Hay Ginoo!
Kuman, (idiresto ko na kay may opisina pa ako ha?) di na maibalik an jadto na mga adlaw! Sahay mutoyo man an luha sanan sip-on ko na isipon na unta tagtagaan ko pa nan higajon na mas malipajon an ako mga oras kaiban an ako mga ginikanan, maguyang, lumon sanan mga higaya. Kuman? Na di na, Bay, lajo na kaw sa Higakit. Lain na mga tawo an imo kaiban. Waya nay binignit, waya nay kinilaw, waya nay panit nan litson, waya nay tuba! Kuman hanap hanap mo gihapon an imo taggikanan. Di na mubalik jaon, Bay. Hain na cla kuman? An iban jadto na sa langit.. (Puhon) Hamok cguro ato naabot pero mismo an Higakit lisod abton kuman!!!
Sa tanan na jaon sa Higakit unta ijo kutluon an mga marajaw nato na mga buhat sanan eksperyensya na amoy ato puhunan para kita mulangyaw sa isa ka PANAWAN na kita ray nahibayo. Di ko gajod makalimtan an ako lugar na takatawhan... Gusto ko muoli, pero lisod man sab karajaw kay an ako napundaran dili man muhatag dako nan higajon para muhayok ako sa lupa, sanan muagi sa menteryo para magpasalamat sa mga tawo na naggunot sa ako alima para ako makapanaw sa marajaw na dayan. Kon hain man ako kuman, o kita kuman, di gajod nato hikalimtan an Higakit. Lajo man kita didto pero an ato kabubut-on sanan kasingkasing jadto sa ila kay hangtod sa ikapugtak nan ako panan-aw dili nako ikalimod na malipajon ako sa pagmatuto nan ako lugar na natawhan. Amo ra.
Viva San Agustin!
Salamat!!! (Unta hamok pa an ako isuyat lamang kay nagdali man ako sa iban na aktibidades!!!)
i lyk 8
ReplyDelete